ჯვრის მონასტერი

ჯვარი ერთ-ერთი ყველაზე ცნობილი, პოპულარული და მნიშვნელოვანი ღირსშესანიშნაობაა საქართველოში და იგი ერთნაირად პოპულარულია როგორც ტურისტებში, ისე ადგილობრივ მოსახლეობაში. ჯვრის მონასტრის პოპულარობა განპირობებულია მისი ისტორიითა და მდებარეობით. იგი მდებარეობს ულამაზეს ადგილზე — მთის წვერზე, ძველი დედაქალაქის, მცხეთის პირდაპირ და ორი მდინარის, მტკვრისა და არაგვის შესართავზე. ეს ადგილი მთელი წლის განმავლობაში მომაჯადოებელია და უკვე იქცა ერთ-ერთ სიმბოლურ ადგილად — შთაგონების წყაროდ მრავალი პოეტისა და მწერლისთვის.

ჯვარი არის მონასტრული კომპლექსი უზარმაზარი რელიგიური და სულიერი მნიშვნელობით, რადგან სწორედ აქ დაიწყო ქრისტიანობა საქართველოში. მონასტერი აშენებულია იმ ადგილზე, სადაც აღმართეს პირველი ხის ჯვარი, რაც ქვეყნის გაქრისტიანების სიმბოლო გახდა და შესაბამისად, მთავარი სალოცავი ადგილი იყო. თავად სახელიც — „ჯვარი“ — პირდაპირ მიანიშნებს მის ისტორიულ მნიშვნელობაზე.

ჯვარი არის გუმბათოვანი არქიტექტურის პირველი ნიმუში საქართველოში. იგი აშენდა 15 საუკუნის წინ ქართლის ერისთავის, სტეფანოზ I-ის მიერ. ჯვარი, როგორც უძველესი ქართული სამეფოს მაღალი კულტურული და მხატვრული დონის მაჩვენებელი და კავკასიის რელიგიური არქიტექტურის გამორჩეული ნიმუში, 1994 წლიდან შეტანილია იუნესკოს მსოფლიო მემკვიდრეობის სიაში.

ჯვართან მისვლა ძალიან მარტივია. იგი დედაქალაქ თბილისიდან მხოლოდ 20 კმ-ით არის დაშორებული. შეგიძლიათ ჩაჯდეთ ნებისმიერ მარშრუტკაში, რომელიც დასავლეთის მიმართულებით მიდის (მცხეთა, ნატახტარი, გორი და სხვ.) და გაჩერება მოითხოვოთ, შემდეგ კი დაახლოებით 40 წუთი იაროთ ფეხით ან ტაქსი დაიქირავოთ. ზოგადად, საქართველოში საზოგადოებრივი ტრანსპორტი მარტივი და ხელმისაწვდომია. ასევე შეგიძლიათ შეარჩიოთ ტური, რომელიც პირდაპირ ჯვრის მონასტერში მიგიყვანთ.