ბახმარო

ოდესმე წარმოგიდგენიათ ზამთრის ზღაპრული სამყარო? არა — ეს არ არის ლაპლანდია, და დიახ — ეს არის საქართველო. ჩვენთან სანტა კლაუსი არ ცხოვრობს, თუმცა გვყავს ირმები, გვაქვს უხვი თოვლი და პატარა, მყუდრო ხის სახლები ბუხრებით. ასევე გვყავს წმინდა ბასილი, მეკვლე, გოზინაყი და მრავალი სხვა ტრადიცია, რომლებიც გურული ახალი წლის უნიკალურობასა და განსაკუთრებულობას ქმნის.

დიახ, საუბარია საქართველოს დასავლეთ ნაწილზე — გურიის რეგიონზე, ქვეყნის ერთ-ერთ ყველაზე ნაკლებად ცნობილ კუთხეზე, სადაც უცხოელი ვიზიტორები იშვიათად ხვდებიან.

თბილისიდან დაახლოებით 340 კილომეტრში დასავლეთით, ზღვის დონიდან 2050 მეტრის სიმაღლეზე მდებარეობს ცნობილი და ყველასათვის საყვარელი კურორტი ბახმარო. ბახმაროს განსაკუთრებული მდებარეობა აქვს — ის მოთავსებულია ქვაბულში, რომელიც გარშემორტყმულია ნაძვებისა და კავკასიური სოჭის ტყეებით. აქ ერთმანეთს ერწყმის მთისა და ზღვის ჰაერი, რაც ქმნის უნიკალურ ბუნებას.

ბახმარო განსაკუთრებით ცნობილია ზამთარში, თუმცა ზაფხული აქ კიდევ უფრო ლამაზი და სასიამოვნო შეიძლება იყოს მარტივი მიზეზის გამო — ინფრასტრუქტურის ნაკლებობა ზამთარში აქ მოხვედრას ართულებს. მიუხედავად ამისა, ყველაზე გაბედული მოგზაურები ჯილდოვდებიან ადგილობრივი სტუმართმოყვარეობით, უნიკალური ბუნებით და ზამთრის ზღაპრულ სამყაროსთან შეხვედრით.

ბახმარო არანაკლებ მიმზიდველია გაზაფხულსა და ზაფხულშიც. მთა გადრეკილიდან ანუ „მზის ამოსვლის გორა"-დან  დამსვენებლებს უყვართ დილის მომაჯადოებელი ხედებით ტკბობა, როდესაც მზე თითქოს ღრუბლებიდან ამოდის.

რაც შეეხება ინფრასტრუქტურას — ბახმაროში არის ხის კოტეჯები, თუმცა არ არსებობს ცენტრალური წყლის სისტემა. ასევე არის ადგილობრივი მაღაზიები და არასტაბილური ელექტროენერგია. მოგზაურებს ხშირად თავად უწევთ წყლის მოტანა ახლომდებარე ნაკადულებიდან. თუმცა ეს ყველაფერი ამ კურორტს მხოლოდ ხიბლს სძენს, რადგან აქ ხომ სწორედ ისინი მოდიან ვისაც ბუნებასთან შერწყმა სწადია.

თუ გიყვართ ლამაზი, მაგრამ ჯერ კიდევ ნაკლებად ათვისებული ადგილები, ბახმარო სწორედ თქვენთვისაა. საქართველოს ზამთრის ზღაპრული სამყარო გელოდებათ!